好多sis都好奇月經杯點用？即刻教您月經杯嘅摺法、放入同取出技巧，等您輕鬆上手！
一、月經杯摺法:
月經杯嘅摺疊方法好多，最緊要係搵到最啱自己同自己個杯嘅方法。如果某種摺法令月經杯不易展開，或放入的時候不舒服，您可嘗試另一種摺法。如果您有幾個月經杯，且硬度不同，摺法也會有所不同。
幾種常見摺法 -
- C字摺: 最常被介紹嘅方法。放入時開口較大，不建議使用。
- 壓摺 / Punch down: 簡單快捷，放入時開口細，容易掌握。如果月經杯太軟，就未必啱用。
- 7字摺: 簡單快捷，但係開口同杯身都比較大。可以試吓將手指放入摺痕之間，輕輕咁撐開杯邊。
二、月經杯點放？
- 洗手。
- 搵個舒服嘅姿勢 (例如坐喺馬桶上、單腳踩喺馬桶上、踎低)。
- 輕輕撥開陰唇。
- 將摺好嘅月經杯瞄準尾龍骨方向放入，直到手指掂到身體。
- 放開月經杯，如果未完全放入，可以用手指推上去。
- 用手指檢查月經杯有冇完全打開，同埋確認子宮頸喺月經杯入面或者下面。
- 擠壓陰道肌肉，將月經杯推近陰道口。
- 輕輕拉吓月經杯，檢查有冇形成密封。如果有少少阻力，就代表密封成功。如果好容易拉郁，就可能需要捏吓杯底或者轉吓個杯，等佢形成密封。
三、月經杯點拎出？
- 洗手。
- 搵個舒服嘅姿勢 (例如坐喺馬桶上、單腳踩喺馬桶上、踎低)。
- 擠壓陰道肌肉，將月經杯推近陰道口。
- 輕輕撥開陰唇，搵到杯柄。
- 如果需要，可以輕輕扭吓杯柄，將月經杯拉低，直到掂到杯底。
- 捉實杯底，將月經杯慢慢拉出嚟，小心唔好漏。
- 將經血倒入馬桶。
- 清洗月經杯，然後重新放入或者收好。
💡小貼士:
- 放鬆心情！緊張會令肌肉收縮，更加難放入同取出月經杯。
- 唔好心急！如果覺得沮喪，可以休息一陣再試。
- 多練習！即使唔係M到嘅日子都可以練習，熟能生巧！
- 如果覺得乾澀，可以用水性潤滑劑。
- 如果覺得唔舒服或者腫脹，就要停低休息一陣。
- 要打破密封先可以取出月經杯，如果唔係可能會拉扯到子宮頸，造成不適。
- 取出月經杯嘅時候，要小心保護尿道，避免摩擦或者觸碰到。
唔好灰心！每個人嘅身體都唔同，需要時間去適應。如果試咗幾次都唔得，或者用咗幾個月都覺得唔舒服，可以試吓其他牌子或者其他種類嘅月事用品。最緊要係搵到最啱自己嘅方法！
四、月經杯存放
大部分月經杯都會附送一個存放嘅布袋或者收納盒，通常係棉布袋或者有透氣孔嘅容器。如果冇嘅話，您可以自行選購一個細嘅棉布袋。確保月經杯乾淨乾爽，放喺通風嘅地方就得啦！
💡 唔好用密封嘅容器或者膠袋存放！ 咁樣會令水份積聚，滋生細菌，產生異味。
五、月經杯倒血
月經杯可以連續用12個鐘，但實際情況要視乎您嘅經量而定。經量多嘅話，可能每4-6個鐘就要倒一次。
點先知幾時要倒？最穩陣嘅方法就係計時！
- 經期嚟得最多嗰日，放入月經杯之後，Set個鬧鐘3個鐘。
- 3個鐘之後，拎出嚟睇吓經血嘅量。
- ¼ 杯：可以再用幾個鐘。
- ½ 杯：可以再用1個鐘左右。
- ¾ 杯：就差唔多要倒啦。
- 去到透氣孔或者以上：要縮短使用時間，例如改為2個鐘倒一次。
💡 記住：每個人嘅經量都唔同，所以要自己試吓先知幾時要倒。經期尾聲嘅時候，就可以延長使用時間。
六、在公共廁所清空月經杯
月經杯容量比衛生巾、棉條大，可以減少去廁所更換嘅次數。如果月經杯容量不足以支撐12小時，可以考慮以下方式：
- 快速放回： 直接倒經血，然後放入陰道。
- 用紙巾抹： 倒完經血之後，用紙巾抹乾淨再放返入去。
- 搵個私人廁格： 最好搵啲有洗手盆嘅廁格，方便清洗。
- 自備水樽： 可以帶個細水樽入廁格沖洗月經杯。
- 濕紙巾： 可以用濕紙巾抹乾淨月經杯或者自己。
💡 小貼士： 去廁所之前，可以喺馬桶入面放幾張廁紙，咁經血就唔會直接掂到馬桶，更加乾淨衛生！
七、月經杯清潔 / 消毒
- 煲滾消毒: 建議每次使用前和經期後用滾水消毒至少3-5分鐘。可以用煲滾水，或者用微波爐加熱水（用微波爐適用嘅容器，唔好冚蓋）。
- 專用清潔劑: 各牌子有月經杯專用清潔劑同濕紙巾。
- 溫和肥皂: 可以用無香料、無油、無抗菌功能嘅溫和肥皂清洗。
- 消毒片: 使用Milton消毒錠d清潔月經杯。
- 消毒噴霧：使用矽膠專用消毒噴霧。
八、去除異味/污漬
- 浸泡: 可以將月經杯浸泡喺過碳酸鈉內至少1-2小時，可同時清潔及去除異味。
- 專用清潔劑: 專用清潔劑同濕紙巾可去除異味。
如果月經杯有氣孔，可以將杯裝滿水，用手掌壓住杯邊，將水擠出氣孔，沖走入面嘅經血。亦可以用牙縫刷清除頑固嘅經血。
💡 注意事項: 以上方法僅供參考，使用前請參考月經杯品牌嘅官方建議。過度清潔可能會縮短月經杯嘅壽命。如果月經杯摸落去黏笠笠，洗唔甩，就可能係月經杯已損壞，需要更換。
九、潤滑劑
如果陰道分泌嘅天然潤滑液唔夠，放入月經杯時可能會覺得困難，建議用水性潤滑劑。
💡 千祈唔好用矽性潤滑劑！ 油性、矽性潤滑劑會損壞月經杯嘅矽膠材質。
十、月經杯卡住 / 失蹤
陰道唔係一條無底嘅運河，而係似一個氣球。即使真係摸唔到月經杯都唔使驚！月經杯唔會喺陰道入面消失，亦唔會進入身體其他部位。如果陰道比較長或者子宮頸比較高，月經杯的確有可能滑到比較入嘅位置，甚至卡喺陰道穹窿（子宮頸周圍嘅區域），令你摸唔到。
如果遇到呢種情況，試下以下方法：
- 踎低: 呢個姿勢可以令盆骨向前，更容易摸到杯底。
- 用力推: 好似排便咁用力推，將月經杯推到陰道口。
- 搵到杯柄: 用手指伸入陰道，搵到杯柄之後，輕輕搖晃、移動同擺動月經杯，等佢滑落到你可以摸到杯底嘅位置。
破壞密封: 捏住杯底，或者用手指按壓杯身側面，破壞密封嘅吸力。
